Kode Etikoa

Kode Etiko honek BIZGARRIn beren lanbide-jardueraren garapenean beren aplikazio-eremuan sartzen diren pertsonen jokabidea gidatu behar duten jokabide-printzipioak eta jarduera-arauak ezartzen ditu.

Indarrean dagoen legeriaren, Elkartearen balioen eta barne-arauen araberako jarduera bermatzea du helburu, eta nahitaez bete beharreko eta erabakiak hartzeko erreferentzia den tresna da.

Asociación BIZGARRI Elkarteko Zuzendaritza Batzordeak Kode Etiko hau onartu du, erakundearen jarduerarako erreferentzia-esparru gisa. Kode Etiko hau nahitaez aplikatu behar zaie bere esparruan dauden pertsonei, eta, era berean, erabiltzaileekiko, hornitzaileekiko, erakunde laguntzaileekiko eta administrazio publikoekiko harremanak bideratu behar ditu.

Asociación BIZGARRI Elkarteak bere egiten ditu Kode honetan jasotako jokabide-printzipio eta -arauak, eta bete egin beharko ditu bere jarduera guztietan.

A. Aplikazio-Eremua

Kode Etiko hau honako hauei aplikatuko zaie:

Gobernu- eta zuzendaritza-organoak osatzen dituzten pertsonak.
Elkarteko langile guztiak.
Lan-harreman zuzenik izan gabe, beren jarduera Asociación BIZGARRI elkartearen zuzendaritza edo ikuskaritzapean garatzen duten pertsonak.

Elkartearekin lanbide- edo kontratu-harremanak dituzten kanpoko pertsona edo erakundeek kode honetan jasotako printzipioak errespetatu beharko dituzte, kasu bakoitzean ezartzen den moduan.

B. Legezkotasun-printzipioa

Kode honen aplikazio-eremuan sartzen diren pertsonek indarrean dagoen legeriaren arabera jokatu beharko dute une oro, eta lege-urratzea edo Elkartearentzat erantzukizuna sor dezakeen edozein jokabide saihestu beharko dute.

Era berean, BIZGARRI elkarteak bere jardunean ezarritako barne-arauak, protokoloak eta prozedurak bete beharko dituzte.

C. Osotasuna eta Ospea Jardueren Kudeaketan eta Garapenean

Kode honen eremuan sartzen diren pertsonen jarduna osotasunaren, objektibotasunaren eta gardentasunaren printzipioek eraendu beharko dute, eta debekatuta egongo dira eroskeriarekin, funtzionario-eroskeriarekin edo edozein motatako ustelkeriarekin lotutako jokabideak.

Debekatuta dago erabakiak hartzean edo lanbide-eginkizunak betetzean eragin desegokia izan dezaketen dirua, opariak edo abantailak onartzea edo eskaintzea.

Kode honetan sartutako pertsonek erantzukizunez bete beharko dituzte beren eginkizunak, Elkartearen baliabideak egoki erabiliz eta helburu pertsonaletarako edo jardueratik kanpoko helburuetarako erabiltzea saihestuz.

Erabakiak irizpide objektiboetan oinarritu beharko dira, interes pertsonalen edo Elkartearen xedeekin zerikusirik ez duten interesen edozein eragin saihestuz.

Aplikazio-eremuan sartzen diren pertsona guztiek jakinarazi beharko dute beren edo besteren interes-gatazka, inpartzialtasunari edo beren funtzioei eragin diezaiekeena.

D. Pertsonak Errespetatzea

Elkarteak pertsonen duintasunaren errespetuan, tratu-berdintasunean eta diskriminazio ezan oinarritutako lan-ingurunea sustatzen du.

Debekatuta daude jazarpena, tratu iraingarria, diskriminazioa edo oinarrizko eskubideen urraketa eragiten duten jokabide guztiak, bai langileen artean, bai erabiltzaileekiko harremanetan.

Jokabide horiek ezarritako barne-prozeduren arabera tratatuko dira; bereziki, jazarpen-protokoloa eta informazioko barne-sistema.

E. Osasunaren eta Ingurumenaren Segurtasuna eta Babesa

Pertsonen segurtasunak, osotasun fisikoak eta osasunaren babesak lehentasuna izango dute Elkartearen jarduerak garatzean.

Edozein erabakiren aurrean, kontuan izan behar da Elkarteak ematen dituen zerbitzuen erabiltzaileen segurtasuna, langileena eta laguntzaileena, hornitzaileena eta negozio-bazkideena, eta Elkartearen ingurune sozialarena, guztien osotasun fisikoa babesteko eta haien osasuna zaintzeko.

Elkarteak laneko ingurune segurua eta osasun fisiko eta mentala babestera bideratutako prebentzio-kultura sustatuko ditu, laneko arriskuen prebentzioari buruzko araudia aplikatuz.

Debekatuta dago jarduera profesionalari eragin diezaioketen edo pertsonen segurtasuna arriskuan jar dezaketen substantziak kontsumitzea, aplikatu beharreko araudian eta Elkartearen barne-politiketan ezarritako baldintzetan.

Elkarteak sustatuko du ingurumena errespetatzea, baliabideak erantzukizunez erabiltzea eta bere jardueretan aplikatu beharreko ingurumen-araudia betetzea.

G. Informatzeko Betebeharra. Informaziozko Barne Sistema

Kode honen aplikazio-eremuan sartzen diren pertsonek informazioko barne-sistemaren bitartez jakinarazi beharko dute, araudia ez betetzea edo Kode hau urratzea ekar dezakeen edozein egitate edo jokabide.

Elkarteak informazioko barne-sistema bat du, araudia betetzearekin lotutako komunikazioak eta kontsultak egiteko aukera ematen duena, haien konfidentzialtasuna eta izapidetze egokia bermatuz.

Komunikazioak barneko informazio-sistemaren bidez edo ezarritako barne-kanalen bidez zuzendu ahal izango dira, zehaztutako prozedurei jarraiki.

Elkarteak komunikazioen konfidentzialtasuna eta errepresalien aurkako babesa bermatuko die fede onez ez-betetzeei buruzko informazioa ematen duten edo ikerketan laguntzen duten pertsonei.

H. Kode Etikoaren Hutsegiteak

Kode Etiko hau betetzea nahitaezkoa da. Koordinazio- edo gainbegiratze-erantzukizunak dituzten pertsonek horiek ezagutzea eta aplikatzea sustatu beharko dute.

Kode honetan xedatutakoa betetzen ez bada, diziplinazko neurriak hartu ahal izango dira, aplikatzekoa den lan-araudiaren arabera, hargatik eragotzi gabe sor litezkeen bestelako legezko erantzukizunak.

I. Kode Etikoaren Zabalkundea

Kode Etikoa eskuragarri egongo da erakundeko pertsona guztientzat eta hirugarrenentzat, barneko kanalen eta Elkartearen webgune korporatiboaren bidez.